Håkon Håkonssons Norgesvelde

I løpet av Håkon Håkonssons styringstid vart fleire områder som tidlegare hadde hatt eit tett samarbeid med Noreg formelt lagt inn under den norske kongen. Det skjedde ved at dei gjekk med på å betale skatt til den norske kongemakta og let kongen sende sine tenestemenn dit.  

Rundt 1265 omfatta dette riket fastlands-Noreg, Island, Grønland, Færøyene, Orknøyane, Shetland, Hebridane og Isle of Man. Kong Håkon engasjerte seg også i utanrikspolitikken og det norske kongedømmet hadde ein høg posisjon blant Europas kongehus. Mellom anna gifte han dotter si, Kristin, med ein spansk prins.  

Håkon Håkonsson vart født på Østlandet i 1204. Far hans var nyleg død og landet var prega av uro. På  Austlandet var det baglarane som dominerte og Håkon sitt liv var i fare. Håkons far og farfar hadde leia birkebeinarane, og dei sørga no for å frakte Håkon til Nidaros som var kontrollert av birkebeinarane. Der kunne Håkon vere trygg. Sagaen som vart skriven om Håkon fortel korleis den vesle guten vart båre i kappa til ein av birkebeinarane mens dei gjekk på ski i vind og kulde over fjellet, jaga av baglarane.  

Forteljingane om Håkon Håkonsson er også forteljingar om korleis det norske kongedømmet vart eit av dei største og sterkaste kongedømma i landet. Forteljingane om det norske kongedømmet på 1200-talet har difor fått ein viktig plass også i det moderne Noreg. Forfattaren Henrik Ibsen skreiv om dette i skodespelet ‘Kongsemnerne’ i 1863. Kunstnaren Knut Bergslien måla biletet ‘Birkebeinerne’ i 1869.

Seinare har det blitt skriven mange bøker og laga filmar om kong Håkon og det som skjedde i hans barndom og som vaksen konge. Filmen ‘Birkebeinerne’ som kom i 2016 er eit nyleg eksempel.  

Kong Håkon brukte lovverket for å gjere samfunnet tryggare og kongemakta sterkare. I løpet av 1260-åra starta han eit arbeid med å få slutt på blodhemn, det vil seie at offeret eller familien kunne hemne seg på den eller familien til den som har gjort uretten. Det førte til mykje uro og tap av menneskeliv.  

Det vart også vedtatt ei ny tronfølgjelov. Den bestemte at dersom kongen døydde skulle den eldste sonen kongen hadde med dronninga overta som ny konge. Dette var eit viktig tiltak for å hindre at det braut ut strid om kongemakta ved tronskifte. Frå no av føregjekk alle tronskifte fredeleg i Noreg.